الثلاثاء , 2 مارس 2021

#التربية رغم بالصفحة يمكن 50 بوست تحدثنا بي عن طرق...

#التربية

رغم بالصفحة يمكن 50 بوست تحدثنا بي عن طرق استقلال الطفل ، وكيف ينمو الطفل ، وكيف ياكل الطفل وكيف توازن الام بين فسح المجال للاستقلال دون الدخول في عالم الاهمال وغيرها،

بفديو نشرتة قبل كم يوم (الاكثر من جميل) الي جان عبارة عن طفل رائع ياكل طعامه اللذيذ بطريقتة الخاصه ومستمتع بلحضاته ومندمج

جانت اكو تعليقات من نوع عوع هاي شنو وسخ نفسه وميصير نخلي هيج وهاي لعبان نفس مو اكل ولازم امه توكله حتى لاتكضي الوقت تنظف؟!

والعديد من التبريرات الي تدافع عن هذا المنطق (ان نحرم الطفل من ان يجرب ان يتناول طعامه بطريقته فقط حتى لا ننظف وراه وحتى لاياخذها للكبر وحتى لا يصير فوضوي )

ناخذ الموضوع حبة حبه

💎اول نقطة: (ماله داعي يسوي هيج)
بينما بالحقيقة نشاط اطعام الطفل لنفسه يعود علية بهواي فوائد، منها:
🔸 تطوير حاسة اللمس، من خلال تحسس قوام الطعام،ودرجة حرارتة (من ساخن الى بارد الى دافئ وفاتر)
🔸تطوير مهارة الامساك والافلات،
🔸الاستدال على مكان الفم ،
🔸تطوير التنسيق البصري اليدوي
🔸الشعور بالاستقلالية وزيادة الثقة بالنفس
🔸التركيز بشعور الجوع والشبع
🔸معرفة شكل الطعام، ملمس الطعام مع معرفة طعمه

بينما لو ياكل كله هرس ومن الخاشوكه ميدري هو شدياكل اصلا

زين هل جبر على الام تستخدم هاي الطريقة ؟
طبعا لا مو جبر ، بس اكيد الام الي توفر هاي الانشطه تنطي فرصه افضل لطفلها ان ينمو ويستخدم حواسه

ممكن الام تستخدم بدائل، اذا وقتها يسمح طبعا

💎نتكلم بثاني نقطة: اعترضتو انه متحبون هاي الطريقة لان تحتاج تنظيف، وماكو وقت ولا واهس للتنظيف، فشلون حتنطوه بديل وهو وقت ماكو؟

وياهو الاسهل استغلال وقت اطعام الطفل لتعليمه وتطويره لو تبقى الام تصرخ افتح حلكك واكل عاد وفضها ويلا ويلا وطبعا متاكده فرق الوقت والجهد لايقارن

طبعا محنتكلم على طريقة البعض باستخدام الهاتف لتشتيت نظر الطفل وتركيزه عن الطعام ويتحول الى دميه مجرد تحشوها بسرعة بالاكل

💎اما ثالث نقطة الي تكول هو مديعرف ياكل وبس لواص!
اممم اكو واحد اول ما طلع من بطن امه يركض؟
لو اكيد مجان يعرف يمشي ولا حتى يزحف وظل يحاول ويحاول لحد ما تعلم؟
فهل من المنطق ان نمنع الطفل ان يتدرب لان هو ميعرف؟
واذا هو يعرف اصلا مجان سميناة طفل 😅

💎رابع نقطة : البعض اعتبروه حياخذ الفوضوية للكبر
وهذا الشي ابدا مو صحيح
لو صحيح جان بعدنا كلنا نزحف لحد الان
الطفل يمر بمراحل وكل مرحلة من ياخذ استحقاقها يتقدم ويحرز تقدم
وهيج اطفال (الي يبدي يتدرب على اطعام نفسه بنفسه) يوصولون مراحل رائعة من التنظيم والتدريب واكو على عمر سنه ونص واكو على عمر سنتين (حسب قدرات الطفل) يتقن الموضوع وياكل بمنتهى الترتيب والاناقة
وحتى لاتكولون هذولي اجانب ويختلفون ، ابشركم اطفال عراقيين اب عن جد

💛💚ختاما ، تبقى كل ام الها الحرية باختار طريقه تربية طفلها واستخدام النمط والاسلوب الي تشوفه مناسب ، واكيد اكو انماط افضل من انماط، مثل الغذاء الصحي لايقارن بالغذاء المصنع

واختيارها لنمط معين حيعود عليها وعلى طفلها بالنتائج سواء سلبا او ايجابا

فاذا كان اختيارج لنمط معين، محلو تنتقدين وتشمأزين من الامهات الاخريات لاختيار نمط اخر ، سواء احسن او اسوا

احنا مجرد نوضح الفوائد والطرق السليمه ، من اجل نمو سليم ومريح

اكيد الطفل الي يتعلم ياكل ، هو طفل سليم وصحي
والي عمره 7 سنين ويصفن وينتظر امه توكله ، اكيد اكو مشكلة وهذا شي مو ضمن الفطره

فلا تشجعون على الاخطاء ، ولاتبرروها

عادي اختاري شي معين اذا جان يناسبج وكولي لهنا قدرتي وهذا الشي اعتبرة يناسبني ،

ختاما
هني ومري للاطفال الحلوين 🥰

د.اسماء اسماعيل البدري

عن د. سلمان داود

طبيب مقيم اقدم اطفال

شاهد أيضاً

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *