#التربية عمر السنتين المراهقة الاولى شلون نتعامل وي الطفل بهاي...

#التربية

عمر السنتين

المراهقة الاولى

شلون نتعامل وي الطفل بهاي الفترة العمرية الحرجه؟🤔

◀️قبل الدخول في مجموعة من النصائح اود ان اذّكر ،
❌لاتكثر من القوانين ولا تحاول ضبط طفلك دائما،
(لابأس بالاخطاء والكثير من الاخطاء مقابل المحاولة او الشروع في اصلاحها )

◀️واحذر من ان تدخل طفلك في قالب صارم لان ذلك سيغرس بذور النفاق في شخصيتة (يظهر الود والمحبة وفي داخلة غضب ينفس عنه باقرب فرصة في الخفاء من مرأى المجتمع)

🌼1.بدلا من ان تنادى على طفلك 1500 مره ، توجه اليه وامسك يده وقل له هلا تأتي معي؟
بالعراقي: بدل ما تصيحة الف وخمسميه مره روح عليه الزمه من ايده وكله تعال اريدك بشغلة ، محتاجك بشغلة، تعال ساعدني

🌼2.بدلا من محاولات فرض الرأى والصراع لارتداء ملابس الخروج، قدم له خيارين وقل له ماذا تحب ان ترتدي؟
بالعراقي: من تردون تطلعون بدل ما تظل تعاركه يلبس هدوم الطلعة وهو يريد يلبس بجامه النوم مال سبايدر مان , حضر مسبقا قطعتين ملابس وكله ياهو تحب نلبس (وطبعا بجامه سابيدر مان مو ضمنهن) 😂

🌼3.بدلا من ان تخبره الف مره لاتفعل كذا، وجه ليفعل اشياء معينه
بالعراقي: بدل ما تكله لاتسوي هيج، لا تعلب بهاي ، لاتشمر هنا، لاتضرب اختك
كله : خلي هاي الطاسة هنا، العب بهاي الخاشوكه، اشمر هنا بالسلة ، احضن اختك ،

🌼4.بدل من ان تقوم بالمهام عنه، اشركه بجزء منها
بالعراقي: بدل ما تشيلة وتغسل ايده وهو يظل يرفس وانت متدري ليش كاعد يرفس 😂💔
هو يريد يمارس استقالة لذلك خليلة طبلة صغيرة يصعد عليها ووجهه يفتح المي، خليلة صابون بايده وخل يفركها وهو يغسلها
ممكن طبعا مايدبر كل هاي الخطوات من اول مره لذلك جزئها مثلا اليوم بس يصعد الطبلة، مره لخ يصعد الطبلة ويفتح المي وهكذا

🌼5.بدل من محاولات الاقناع المنطقية ، اجعل الموضوع اقرب للمزاح واللعبة
بالعراقي:
👶ماماااا بسكت!
(وهو اكله كله) ويريد بعد ، والبسكت خلص
ممكن طبعا تكليلة اكلته وخلص ومره لخ عود نشتري ، وممكن طبعا يستجاب ويسكت
لكن الغالب حيبقى يصيح ويكول ماااا بسكت وتبدأ المناحة 😆

فاستخدمي الطريقة البديلة الي هي :
😳يااا وين راح البسكت 😳 وسوي وجهج متفاجأة كلش ومستغربة!
وابدي صيحي بسسسكت!! بسسسكت! وين رحت !!
وسوي تعابير انه دتسمعين صوته
اشش اشش اسمع ،، صوت البسكت!
وتقربي على بطنه وسوي نفسج دتسمعين الصوت
وكولي هياااانه البسكت 😆 ✋
كاعد ببطنك اكلته كله
ودغدغي (بلطف مو عنف لدرجة تخربطين ترتيب امعائه وتسويله ثقب بجدار البطن 🤣)
وحينتهي الموضوع بلطافة وينسد موضوع البسكت الى اشعار اخر

🌼6.اكثري من الاحتضان وترديد كلمات المديح والحب
بالعراقي: شبعي حضن وبوس ومدحي هواي واستغلي كل موقف لطيف حتى تمدحي :
👩🏻‍🦱حبيبي البطل شكد حلو ياكل❤️
👩🏻‍🦱بنتي السباعية تساعد ماما
👩🏻‍🦱فدوة لهالوجه الحلو
👩🏻‍🦱فديت عيونج الحلوات

وغيرها

🌼7.احصر الممنوع بقانون ال”لا الثلاثة”
لا للحرام
لا للتعدي على ممتلكات الغير وتخريب البيئة
لا للمخاطرة بالسلامة
يعني ممنوع تماما يسوي شي حرام (مثلا ياذي الحيوانات)
ممنوع تماما ياخذ شي مو مالته
وممنوع تماما يلعب بالسجينة

عداها انطي مجال يلعب ويجرب ويستكشف بالمعقول وكلما كان ذلك ممكن ،

🌼8.بدلا من توبيخة واعاده العقوبة 700 مره لنفس الفعل ، وجهه لاصلاح الضرر بدون كثرة كلام ووعيد وتهديد
بالعراقي: بدل ما كلما يشخبط ع الحايط تجي تعيط وتمزجر وتضربة ووووو
كله لا خطأ .. نكتب بالورقة مو على الحايط .. تعال نظفه وانطي اسفنجه رطبه وخلي يبدي ينظف
طبعا اكيد ميدبرها ولا يحيسوي نظيف يبرج، بس الفكره انه بدا يحاول يصلح خطأة ومره على مره حيتحسن هواي(على مستوى تصليح اخطاءة وعلى مستوى يقلل من ارتكاب الخطأ)

🌼9.العمر هذا صعب وعادي جدا يمر بايام مزاج تعبان ويكون شد وجذب وماكو تفاهم، تذكري دائما هاي فتره عمرية تنقضي ،، بس الذكريات تبقى بالذاكره ، حتى وان كانت لاتبقى بشكلها الصوري , وانما كل موقف هو يتسجل عنده ويبني جزء من شخصيته

🌼9 .اكثري من الدعاء فهو سحر الهداية
(ربنا هب لنا من ازواجنا وذرياتنا قرة اعين ) ❤️

في الجزء القادم نتحدث عن عمر ال4 سنوات 💥
عمر العواصف 🌪️والرعد🌩️ والبرق ⛈️ والامطار 🤪

د.اسماء اسماعيل البدري

عن د. سلمان داود

طبيب مقيم اقدم اطفال

شاهد أيضاً

شكد الفاصل بين حمل و حمل؟ ممكن يكون تدخل بحريتك...

شكد الفاصل بين حمل و حمل؟ ممكن يكون تدخل بحريتك الشخصيه هذا السؤال فنتركه و …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *