الثلاثاء , 2 مارس 2021

الجهل آفة المجتمع اجانا طفل عمره اقل من سنة يعاني...

الجهل آفة المجتمع
اجانا طفل عمره اقل من سنة يعاني من شحوب شديد ، أثناء الفحص السريري شفنا انه الكبد ماله متضخم والطحال متضخم
بالنسبة للاهل : وجه شاحب يعني فقر دم اعتيادي بسيط يتعالج بالمقويات من الصيدلية بدون طبيب
بالنسبة للطبيب : شحوب حاد مع تضخم بالكبد والطحال معناها اكو مشكلة كبيرة داخل جسم الطفل سببتله تضخم الكبد والطحال وفقر الدم لازم نعرفها شنو حتى نعالج الطفل

سوينا للطفل تحليل دم اعتيادي طلع بيه فقر دم شديد ولازم ننطيه دم، لكن اذا انطيناه دم قبل ما نعرف المشكلة راح تضيع علينا وبعد منكدر نعرف التشخيص لمدة ٣ اشهر القادمة
وبما انه الطفل يتحمل ينتظر يوم يومين كلنا نسوي التحاليل ونشخص المشكلة وبعدين ننطيه دم ونبدي نعالج مشكلته
التحاليل نطلبها تدريجيا خطوة خطوة حتى نشخص المرض ميصير نعبر خطوة ونبدي من النهاية
سويناله تحليل فلم دم ، تقرير اخصائي أمراض الدم كان يكول انه فلم الدم مو كافي حتى نوصل للتشخيص، الظاهر مشكلته أكبر فلازم نسحب دم من نخاع العظم (المصنع مال مكونات الدم) حتى نشوف سبب هالشحوب ونشخص حالة الطفل
سحب الدم من نخاع العظم هو شيء بسيط عبارة عن نيدل قوي ندخله بعظم الساق ونسحب دم ، كل العملية ما تطول اكثر من ربع ساعة وبتخدير موضعي لا اكو ألم ولا شيء ولا بيها خطورة تذكر
الاهل رفضوا السحب من نخاع العظم !
حاولنا نقنعهم بشتى الطرق لكنهم بقوا مصرين عالرفض
والحل شنو؟ غير لازم نعرف تشخيص الطفل قبل لا ننطيه دم
الاهل لانهم بقوا مصرين عالرفض ، استسلمنا من محاولة معرفة التشخيص وقررنا ننطيه دم حتى لا يموت نتيجة فقر الدم الشديد
المصيبة انه الاهل رفضوا ينطون دم للطفل !
بحجة ما نريد ننطيه دم حتى لا يتعود عليه 😞
يعني لا يقبلون نعرف التشخيص بتحليل نخاع العظم ولا يقبلون يخلوله دم حتى ميموت !
واخذوا طفلهم على مسؤوليتهم وطلعوا
شفتوا الجهل شنو ممكن يسوي ؟! هذا الطفل راح يتوفى ١٠٠٪‏ مراح يعيش هواية بدون دم
خطيته برقبة منو؟ اهله الي عاميهم الجهل
لو الإعلام والناس الي يروجون انه إعطاء الدم وتحليل نخاع العظم خطر
اكو ناس من شدة حبهم لنشر الجهل عادي عدهم يكذبون بس حتى يثبت رأيه المتخلف فمثلا تلكوها تكول ( خيتي انطيت لابني دم ومات ) وهي لا عدها ابن ولا واصلة مستشفى بحياتها
تكذب عالناس بقصص واهية حتى تقنعهم انه الدم مو زين
شنو غايتها !؟ متعرف ، بس تحب تنشر الجهل

حساب التوعية على الانستاغرام
‏https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال

عن د. سلمان داود

طبيب مقيم اقدم اطفال

شاهد أيضاً

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *