السلام عليكم ممكن شويه نقرا الموضوع بتمعن؟ اخذوا نفس عميق...

السلام عليكم
ممكن شويه نقرا الموضوع بتمعن؟
اخذوا نفس عميق
الموضوع شويه طويل
راح اشرحلكم شون يصير ابو صفار بالتفصيل و شون يصير العلاج الضوئي مالته و شون الرضاعه تأثر؟
.
نبدي الموضوع كلش من البدايه و نتفق على المباديء العامه
اولا تعرفون اكيد ان الجاره او المشيمه هي اللي تاخذ المواد الغذائيه منك و توديها لطفلك و نفس الشي هي المشيمه تاخذ المواد اللي تنتج في جسم الطفل و يرميها للمشيمه اللي تاخذها من الطفل و توديها لجسمك و بعدين جسمك يطرحها عن طريق الكليه و الكبد مالتك.
.
هاي اول معلومه
المعلومه الثانيه خلايا الدم تعيش فتره ١٢٠ يوم فقط
و بعدين تتكسر و تتحلل و من تتكسر و تتحلل راح يطلع منها جزيئات هذه الجزيئات خلي نسميها جزيئات الابو صفار .
لهنا زينين؟
هذه الجزيئات تاخذها المشيمه(الجاره) و توديها للكبد مالتك اللي يحولها إلى ماده صفراء و تطلع ويه الخروج مثل كل الناس اوكي؟
.
لهنا حلوين؟
نكمل
صارت الولاده و الف مبروك
شنو اللي صار ؟
راحت المشيمه و طلع الطفل وحده
و الدم طبعا يبقى يتكسر بمعدله الطبيعي لان هو عادي كلنا بجسمنا الدم يتكسر بمعدل ١% من كل خلايا الدم يوميا
شنو اللي صار ؟
الطفل صار وحده بدون مشيمه
إذن لازم يصير سبع و يعتمد على الكبد مالته و يذب هذه الماده اللي تنتج عن تكسر الدم اللي اسمها ماده الابو صفار
و نرجع و نذكر هذه الماده تنتج طبيعيا عندي و عندك و عند كل إنسان على وجه الأرض
اوكي هسه ناخذ نفس
المشكله وين ؟
المشكله انه الكبد توا طالع للدنيا ما يشتغل زين و ينرادله كم يوم حتى يستوعب الصدمه و يبدي يشتغل و يبدي يحول ماده ابو صفار إلى الماده الصفراء و يذبها عن طريق الكبد مثلك و مثلي
احيانا تكسر الدم يكون أكثر من الطبيعي لأسباب هوايه مثل اختلاف الدم !
و الكبد ما يشتغل زين فشنو يصير ؟
ابو صفار عالي
و لازم ندخل مستشفى
بس بأغلب الحالات
الموضوع بسيط و ابو صفار بسيط و يروح
.
.
نكمل و نخلي فراغ
ضوا الشمعه شيسوي
ضوء الشمعه يعبر الجلد و يكسر جزيئات ابو صفار و يسويها الا طحين و يخليها تنطرح بالادرار و بالخروج
و بالتالي يساعد الكبد على التخلص من هذه الماده
الرضاعه شنو تسوي ؟
الرضاعه راح تحرك جسم الطفل ككل طبعا لان اكيد تعرفون انه احنا طاقتنا تجي من الاكل و طاقتهم تجي من الحليب فكلما تكثر الرضاعه تنضج خلايا الكبد أكثر و أكثر
إذن يا امي يا عيني
الكبد مجرد ننتظره يشتغل و هو راح يتكفل بالمهمه
و لا خلف الله لا على الثوم و لا على الطبيب
و الحمد لله على نعمه الكبد
و تبارك الله احسن الخالقين
وشكرا الكم
د. سيف سمير البياتي
اخصائي طب الأطفال
الصورة للحليب اللي ينزل اول ١٤ يوم و اللي يسموه السائل الذهبي لان غني بالاجسام المضادة

عن د. سلمان داود

طبيب مقيم اقدم اطفال

شاهد أيضاً

الاصوات الي تصير أثناء تنفس الطفل بصدره او انفه بيها...

الاصوات الي تصير أثناء تنفس الطفل بصدره او انفه بيها هواية اسباب اكو أسباب بسيطة …

30 نصيحه لتكوني اما افضل وزعيها على مدار ال ٣٠...

30 نصيحه لتكوني اما افضل وزعيها على مدار ال ٣٠ يوم 1. قبل ما تعلين …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *