على طاري الفتوى بالطب بدون علم يروى على لسان الزملاء...

على طاري الفتوى بالطب بدون علم
يروى على لسان الزملاء انه بأحد المستشفيات
جاية عائلة يركضون جايبين مريضة شابة
الدكتور يكول اني بقيت صافن من هول العدد الضخم الي جاي وياها والي كلهم وكفوا فوكاي يباوعون
فحصت المريضة مرة مرتين ثلاثة
اشوف المريضة سليمة تماما و الي دتسويه هو تمثيل (تمثل انها مريضة حتى تحصل شي رايدته من اهلها مثلاً او انهم مضوجيها بالبيت ايا كان السبب المهم انها سليمة مو مريضة)
يكول واني افحص افكر شنو اكول لهذا العدد الهائل من الناس وشون اصارحهم بالحقيقة انه مريضتهم تمثل
اجى واحد يصيح وخرو وخرو … ابعد ابعد انطيني طريق
سووله طريق
كال دكتور اني اعرف شبيها المريضة !
كتلة انت منو
كال اني ابن عمها
كتلة شنو بيها؟ توقعت يكول مضوجيها يعني
كال بيها التهاب البروستات الحاد !
الاهل مقتنعين بكلام ابن عمهم وعايفين المستشفى وماخذين مريضتهم حتى يراجعون اخصائي علمود التهاب البروستات العدها
للعلم الاناث ماعدهن بروستات هالشي خاص بالذكور فقط

المصيبة الي عدنا انه ناسنا تثق بالفتوى من الأقارب وتمشي وراها
يمة ليش انطيتي ابنج سگوة؟
جارتي او حماتي كالت كلش تفيد
يمة ليش انطيتي ابنج هذا العلاج مو يضره ؟
عمتي كالت انطيناه لبنت حماي وفادها
و تاليها يجي المريض للمستشفى منتهي بسبب الفتاوي والفضول الي عند البعض
——
حساب التوعية على الانستغرام
‏https://instagram.com/dr_salmand?igshid=qbd41hnknyb3
د. سلمان داود
مقيم اقدم اطفال

عن د. سلمان داود

طبيب مقيم اقدم اطفال

شاهد أيضاً

الاصوات الي تصير أثناء تنفس الطفل بصدره او انفه بيها...

الاصوات الي تصير أثناء تنفس الطفل بصدره او انفه بيها هواية اسباب اكو أسباب بسيطة …

30 نصيحه لتكوني اما افضل وزعيها على مدار ال ٣٠...

30 نصيحه لتكوني اما افضل وزعيها على مدار ال ٣٠ يوم 1. قبل ما تعلين …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *