قال رسول الله صلى الله عليه وسلم “من رأى منكم...

قال رسول الله صلى الله عليه وسلم

“من رأى منكم منكرا فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان”

صدق رسول الله صلى الله عليه وسلم

يعني من تشوف طفل يعنف، تنكر هذا الشي ، مو تكول هاي خصوصية
من تشوف طفل فاقد ابسط حقوقة، تنكر هذا الشي ، وهاي مو خصوصية
من تشوف طفل يعتدى علية، تنكر هذا الشي … وهاي مو خصوصية حتى لو كان المعتدي هو ابوه لو امه لو اخوه لو جده

زين شلون ننكر؟

اول شي بايدك
يعني تروح بايدك تنكر، وبايدك تشمل: ان تدفع تضرب تصد، تحامي
اي نعم بايدك
لكن اذا كنت جبان لدرجة مكدرت تسوي هالشي وخفت المقابل لا يبطش بيك
تنتقل للخطوة الي وراها
والي هي تنكر بلسانك
يعني تكله يا ابن الناس هاي انت شدتسوي حرام عليك ميصير هالشي وحتى لو بصيغة رزالة او صيغة تودد بالمختصر تحجي مو تظل ساكت مثل الشيطان الاخرس

واذا هم صرت جبان وماكدرت وانعكد لسانك، انكر بقلبك وكول لا هذا شي غلط

زين شنو فائدة النكران بالقلب؟
الفائده مره مره من تبقى تنكره بقلبك رح تشجع وتصير عندك قوه في يوم من الايام وتنتقل مرحلة لخ وتنكر بلسانك

بس تذكر نكران القلب هو اضعف الايمان

شكد لعد ايمان العرب ضعيييييييف
للاسف

بحادثة

#نهلة

الطفلة المعذبة تفتر بين المئات من عديمي الاحساس
ولا واحد بيهم نكر بايده وفگ سلاسلها
ولا واحد بيكم نكر بايده وراح على ابوها وحط السلاسل بركبتة
ولا واحد بيهم

مصور فقط استغل الموقف وصوره وهو يحجي وياها
الله اعلم يجوز جان قصده نكران باللسان ،
بس الى متى؟
الى متى نبقى هيج جبناء؟
وليش العرب بالذات عدهم هذا الجبن والمستحى الي مو بمكانة !!

اتذكر بوحده من الاسواق التجارية جان اكو اب وطفل ديمشون بقاطع الزجاجيات
فالطفل بحب الاستكشاف والفضول راد يسحب وحده من الزجاجيات
فالاب سحبه من ايده شوي بقوة
بلحضتها راسا
صاح العامل البنغلاديشي
وكلة no
وبقى يحجي بنترة وعصبية وكله ميصير تجر الطفل هيج !! انت اذيتة

وفشل الاب كدام الكل
رغم ولا واحد عداه انكر على الاب فعلة وان كان فعل الاب عفوي الى حد ما

ليش النكران عدهم شي لا ارادي واحنا عدنا نبقى نتجبجب ونحسب الف حساب؟!
طبعا ما اتجاهل كثره العصابات الي تتصيد بالماء العكر وتستغل اي تدخل شخص بمثل هيج امور
لكن الحل شنو؟
وين رح نوصل بهذا التخاذل؟
اذا اليوم ما تحرك ولا واحد بينا شوكت يتحرك؟
معقولة ماكو محامين ، نشطاء ياخذون الموضوع على عاقتهم ويسوون تفعيل حقيقي للقانون؟

تره لا تتصورون الموضوع يبقى بس نسمع بي عن بعد
اذا منوكف وكفه حقيقيه
لا نستبعد هيج ابتلاءات حتوصل لابناءنا وجيرانا واحفادنا 💔

وطبعا هذا الي دنشوفة نقطه من بحر
الاطباء يوميا يشرفون على آلاف حالات تعنيف الاطفال من قبل اهاليهم بطريقة تقشعر لها الابدان ، وبلا اي تقدم

فقط تراجع
من سئ الى اسوأ

نحن في تراجع دائم ، وفي خذلان دائم 💔

.
.
.
.

د.اسماء اسماعيل البدري

عن د. سلمان داود

طبيب مقيم اقدم اطفال

شاهد أيضاً

الاصوات الي تصير أثناء تنفس الطفل بصدره او انفه بيها...

الاصوات الي تصير أثناء تنفس الطفل بصدره او انفه بيها هواية اسباب اكو أسباب بسيطة …

30 نصيحه لتكوني اما افضل وزعيها على مدار ال ٣٠...

30 نصيحه لتكوني اما افضل وزعيها على مدار ال ٣٠ يوم 1. قبل ما تعلين …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *